टोकियो – जापानको माथिल्लो सदन, हाउस अफ काउन्सिलर्सका लागि आइतबार सम्पन्न निर्वाचनमा कीर्तिमानी ४२ जना महिला उम्मेदवारले जित हासिल गरेका छन् । यो संख्या सन् २०२२ को निर्वाचनमा बनेको ३५ सिटको अघिल्लो रेकर्डभन्दा बढी हो ।

यस पटक चुनाव भएका कुल १२५ सिटमध्ये महिलाले ३३.६ प्रतिशत सिट जितेका छन्, जसले जापानको पुरुष-प्रधान राजनीतिमा महिलाको उपस्थिति बढाउने प्रयासमा एक महत्वपूर्ण प्रगतिलाई दर्शाउँछ । जित हासिल गर्ने प्रमुख महिला व्यक्तित्वहरूमा सत्तारुढ लिबरल डेमोक्रेटिक पार्टी (एलडीपी) की सेइको हासिमोतो र प्रमुख विपक्षी दल कन्स्टिच्युशनल डेमोक्रेटिक पार्टी अफ जापान (सीडीपीजे) की रेन्हो जस्ता चर्चित सांसदहरू पनि सामेल छन् ।

यस पटकको चुनावमा कूल १५२ जना महिला उम्मेदवार चुनावी मैदानमा थिए, जसमध्ये १०२ जनाले चुनावी जिल्लाबाट र ५० जनाले समानुपातिक प्रतिनिधित्व प्रणालीमार्फत उम्मेदवारी दिएका थिए । यो संख्या सन् २०२२ को १८१ जना महिला उम्मेदवारको तुलनामा कम हो । कूल उम्मेदवारमध्ये २९.१ प्रतिशत महिला थिए, जुन सरकारले सन् २०२५ सम्ममा ३५ प्रतिशत महिला उम्मेदवार पुर्‍याउने लक्ष्यभन्दा कम हो ।

विभिन्न पार्टीहरूले महिला उम्मेदवारलाई अघि बढाएका थिए । सत्तारुढ एलडीपीले १७ जना र उसको गठबन्धन साझेदार कोमेइतो पार्टीले ५ जना महिलालाई उम्मेदवार बनाएको थियो । यसको तुलनामा, उदाउँदो दक्षिणपन्थी पार्टी सान्सेइतोले २४ जना, सीडीपीजेले २१ जना, डेमोक्रेटिक पार्टी फर द पिपुलले १२ जना र जापानी कम्युनिष्ट पार्टीले २० जना महिलालाई मैदानमा उतारेको थियो ।

राजनीतिमा महिलाको प्रतिनिधित्वमा यो ऐतिहासिक सफलताका बाबजुद जापान लैंगिक समानताको विश्वव्यापी सूचकांकमा अझै पछाडि छ । विश्व आर्थिक मञ्च (World Economic Forum) को सन् २०२५ को लैंगिक अन्तर प्रतिवेदनअनुसार जापान १४८ देशहरूमध्ये ११८ औं स्थानमा छ, जुन राजनीतिक सशक्तीकरणको क्षेत्रमा कमजोर प्रदर्शनको संकेत हो ।

यद्यपि, प्रतिवेदनले अर्थव्यवस्था, शिक्षा र स्वास्थ्य जस्ता अन्य तीन श्रेणीमा भने जापानले प्रगति गरेको देखाएको छ । यो विश्वव्यापी रैंकिंगले जापानलाई जी-७ देशहरूमध्ये सबैभन्दा अन्तिममा राखेको छ ।