धादिङ नीलकण्ठ नगरपालिकाद्वारा विद्यालय बन्द गर्न सूचना जारी
काठमाडौँ । धादिङको नीलकण्ठ नगरपालिकाले कोरोना संक्रमण रोकथामका लागि आफ्नो पालिका भित्रका सबै विद्यालयलाई माघ १५ गतेसम्म भौतिक उपस्थितिमा हुन पठन पाठन बन्द गर्न सूचना जारी गरेको छ ।
मंगलबार जिल्ला शिक्षा समन्वय इकाईले जिल्लाका सबै पालिकालाई शिक्षा, विज्ञान तथा प्रविधि मन्त्रालयद्धारा जारी निर्देशन कार्यान्वय गर्न अनुरोध गरेको थियो । यसै पत्र अनुसार सूचना जारी गर्दै नीलकण्ठ नगरपालिकाले विद्यालय बन्द गर्न सूचना जारी गरेको हो ।
जिल्लामा बेनिघाट रोराङ, सिद्धलेक गाउँपालिका र नीलकण्ठ नगरपालिका बाहेक अन्य पालिकाले विद्यालय बन्द गराएका छैनन् ।
कोरोना भाइरसको संक्रमण बढ्दै गएपछि गत आइतबार बसेको कोभिड–१९ संकट व्यवस्थापन समन्वय केन्द्र (सीसीएमसीसी) को बैठकले माघ १५ गतेसम्म हिउँदे विदा दिएर देशभरका आधारभूत र माध्यमिक विद्यालय बन्द गर्न आग्रह गरेको थियो ।