चन्द नेतृत्वको नेपाल कम्युनिस्ट पार्टीले पेट्रोलियम पदार्थको मूल्यवृद्धि विरुद्ध आज नेपाल आयल निगम घेराउ
काठमाडौँ । नेत्रविक्रम चन्द नेतृत्वको नेपाल कम्युनिस्ट पार्टीले पेट्रोलियम पदार्थको मूल्यवृद्धि विरुद्ध आज नेपाल आयल निगम घेराउ गर्ने जनाएको छ ।
पेट्रोलियम पदार्थमा गरेको मूल्यवृद्धि विरुद्ध प्रदर्शन गरिरहेको नेपाल कम्युनिस्ट पार्टीले आज निगमको कार्यालय घेराउ गर्न लागेको हो ।
चन्द नेतृत्वको पार्टीले जनताको दैनिक जीवनसँग जोडिने आधारभूत वस्तुको मुल्यवृद्धि गरेकाले तत्काल फिर्ता लिन सरकारलाई आग्रह गरेको छ ।
हेर्दा पेट्रोलियम पदार्थमा मात्र मूल्यवृद्धि भएको जस्तो देखिए पनि यसले चौतर्फी असर पार्ने भन्दै उनीहरुले मूल्यवृद्धि फिर्ता लिन सरकारलाई आग्रह गरेका हुन् ।
मंगलबार राति १२ बजेदेखि लागू हुने गरी साविकको बिक्री मूल्यमा पेट्रोल, डिजल र मट्टीतेलमा प्रतिलिटर ३ रुपैयाँ बढाएर पेट्रोलको प्रतिलिटर १४२, डिजल र मट्टीतेलको प्रतिलिटर १२५ कायम भएको थियो । यसको विरोधमा नेपाल कम्युनिस्ट पार्टीले एक हप्ताको आन्दोलन घोषणा गरेको थियो ।