काठमाडौं । नेकपा (एकीकृत समाजवादी) ले पत्रकार सम्मेलन आयोजना गरेको छ । लामो रस्साकस्सीबीच सदनबाट एमसीसी अनुमोदन भएसँगै राजनीतिक दलहरूले प्रष्टीकरण दिन थालेका छन् ।

नेकपा एसका अध्यक्ष माधवकुमार नेपालले बानेश्वरस्थित अर्पण ब्यांक्वेटमा दिउँसो २ बजे पत्रकार सम्मेलन गर्ने भएका हुन् । नेकपा एसले एमसीसीको पक्षमा उभिनुका कारण पत्रकार सम्मेलनमार्फत प्रष्ट्याउन लागेको हो । सो दलमा एमसीसी पारितप्रति केही नेता असन्तुष्ट छन् ।

प्रमुख प्रतिपक्ष नेकपा एमालेले पनि आजै दिउँसो १ बजे रोयल ब्यांक्वेट तीनकुनेमा पत्रकार सम्मेलन गर्दैछ । एमसीसीसँगै देशको समसामयिक विषयमा एमालेको धारणा सार्वजनिक गर्न पत्रकार सम्मेलनको आयोजना गर्न लागिएको हो ।

नेपाली कांग्रेस र माओवादीले भने हिजै दिउँसो पत्रकार सम्मेलन गरिसकेका छन् ।