हराएको विमान खोज्न सेनाको हेलिकप्टर पठाइँदै

काठमाडौं । तारा एयरको विमान सम्पर्कविहीन भएपछि नेपाली सेनाको हेलिकप्टर खोजी कार्यमा परिचालन गरिने भएको छ । सम्भावित दुर्घटना क्षेत्रमा हेलिकप्टर पठाउने तयारी भएको मुस्ताङ प्रहरी प्रमुख डीएसपी रामकुमार डानीले बताए ।

अहिलेसम्म विमान दुर्घटना भएको कुनै सूचना प्राप्त भएको छैन । तर, मुस्ताङको लेतेमाथि टिटी ताल क्षेत्रमा विमान दुर्घटना भएको आशंका गरिएको छ ।

सोही क्षेत्रमा खोजीका लागि सेनाको हेलिकप्टर पठाउन लागिएको हो । ताराको विमानमा ६ विदेशीसहित १९ जना सवार छन् ।