माओवादी बैठकमा प्रचण्डको ब्रिफिङ- समाजवादी क्रान्तिको लागि छिट्टै विशेष महाधिवेशन

काठमाडौं । नेकपा (माओवादी केन्द्र) का अध्यक्ष पुष्पकमल दाहाल प्रचण्डले चाँडै विशेष महाधिवेशनको तयारी भइरहेको भन्दै समाजवादी क्रान्तिका लागि तयार रहन पार्टी पंक्तिलाई निर्देशन दिएका छन् ।
माओवादी केन्द्रको केन्द्रीय कमिटी बैठकलाई बिहीबार सम्बोधन गर्दै प्रचण्डले छिटै पार्टीको विशेष महाधिवेशन हुने बताए । माओवादीको मंसिरमा सम्पन्न महाधिवेशनले प्रचण्डलाई अध्यक्ष चयन गरेको थियो ।

आफ्नो राजनीतिक दस्तावेजमा उठेका प्रश्नमाथि जवाफ दिने क्रममा अध्यक्ष प्रचण्डले भने, ‘छिट्टै विशेष महाधिवेशन गर्ने तयारी हुँदैछ भनेर बुझ्नुस् । विशेष महाधिवेशनले समाजवादी क्रान्तिको विचारलाई क्रान्तिको तयारी र योजनालाई अर्को उचाइमा पुर्‍याउनेछ ।’

नेपाली जनतालाई कांग्रेस र एमालेजस्तो अर्को पार्टी आवश्यक नरहेको भन्दै माओवादी फरक हो भनेर देखाउनुपर्ने बताए । उनले माओवादीमा पहिचानको संकट रहेको र त्यस्तो संकट कांग्रेस र एमालेमा नरहेको बताए ।