कार्यकर्ता भेट्न प्रधानमन्त्री प्रचण्ड पेरिसडाँडामा
काठमाडौँ- प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले पार्टीका नेता कार्यकर्तासँग भेटघाट गरिरहेका छन् ।
कोटेश्वरस्थित पार्टी मुख्यालयमा अध्यक्ष प्रचण्डले आफ्नो पार्टीका नेता कार्यकर्तासँग भेटघाट गरिरहेका प्रधानमन्त्रीको प्रेस संयोजक सूर्य किरणले जानकारी दिए । प्रधानमन्त्री प्रचण्ड कार्यकर्ता भेट्नका लागि आज बिहान ८ बजे पार्टी कार्यालय पेरिसडाँडामा पुगेका छन् ।
उनका अनुसार हप्ताको हरेक शुक्रबार प्रधानमन्त्रीले पार्टीका नेता तथा कार्यकर्तालाई पार्टी केन्द्रीय कार्यालय पेरिसडाँडामा भेटघाट गर्ने कार्यक्रमको शुरुवात आजबाट भएको छ ।
पार्टीका कार्यकर्ता र जनता सबैलाई हप्तामा एक दिन (शुक्रबार) पार्टी केन्द्रीय कार्यालय पेरिसडाँडामा भेट्ने यसअघि निर्णय भएको थियो ।
२०८० साल वैशाख १ गतेदेखि प्रधानमन्त्री र माओवादीका मन्त्रीहरूले कार्यकर्तासँग पार्टी कार्यालयमा छलफल गर्नेछन् । त्यसका लागि साँझ ४ बजेदेखि ६ बजेसम्मको समय छुट्याइएको छ ।
कार्यकर्ताले प्रधानमन्त्री र मन्त्रीलाई सजिलै भेट्न पाउन् भनेर पार्टी कार्यालयमै भेट्ने व्यवस्था गरिएको माओवादीले जनाएको छ ।