अफगानिस्तानमाथि रोमाञ्चक जित हात पार्दै पाकिस्तानले जित्यो सिरिज
काठमाडौँ- पाकिस्तानले अफगानिस्तानविरुद्धको ३ खेलको एकदिवसीय सिरिज एक खेल अगावै जितेको छ ।
बिहीबार राति श्रीलंकाको हम्बानटोटामा सम्पन्न दोस्रो खेल १ विकेटले जित्दै पाकिस्तानले सिरिज आफ्नो पक्षमा पारेको हो । यसअघि पहिलो खेल पाकिस्तानले १ सय ४२ रनले जितेको थियो ।
बिहीबार राति ३ सय १ रनको लक्ष्य पाकिस्तानले निर्धारित ५० ओभरको एक बल बाँकी छँदा ९ विकेट गुमाएर पूरा गर्यो ।
पाकिस्तानलाई जित दिलाउन इमाम-उल-हकले सर्वाधिक ९१ रन तथा कप्तान बाबर आजमले ५३ रन बनाए । सदाव खानले ४८ रनको योगदान गरे ।
अफगानिस्तानका लागि फजलहक फारुकीले सर्वाधिक ३ तथा मोहम्मद नावीले २ विकेट हात परे ।
यसअघि टस जितेर पहिले ब्याटिङ गरेको अफगानिस्तानले निर्धारित ५० ओभरमा ५ विकेट गुमाउँदै ३ सय रन बनायो । अफगानिस्तानका लागि रहमानुल्लाह गुरबाजले १ सय ५१ रन तथा इब्राहिम जदरनले ८० रन जोडे ।
पाकिस्तानका लागि शाहिन शाह अफ्रिदीले सर्वाधिक २ विकेट हात पारे ।
