सुशासन र भ्रष्टाचारको राजनीतिक रङ हुँदैन : जनार्दन शर्मा
काठमाडौँ । नेकपा माओवादी केन्द्रका उपमहासचिव तथा सांसद जनार्दन शर्माले सुशासन, समृद्धि र सामाजिक न्यायका लागि चालेका कदमहरू स्वागतयोग्य रहेको बताएका छन् ।
बुधवार प्रतिनिधिसभाको बैठक उनले अहिले सरकारले भ्रष्टाचार विरोधी अभियान, सुशासन, समृद्धि र सामाजिक न्यायको पक्षमा पहल अगाडि बढाइरहेको बताए । ‘त्यो पहललाई तीव्र बनाउनका लागि संसद्को तिखो खबरदारी, सहयोग र साथ आवश्यक भएको ठानेको छु’ शर्माले भने ।
भ्रष्टाचार विरोधी अभियान र सुशासनको पक्षको पहलमा राजनीतिक रङ नदिन उनको आग्रह छ । ‘सुशासनको, भ्रष्टाचारको राजनीतिक रङ हुँदैन । यसलाई सुशासन स्थापना गर्न हामी सबैले साथ र सहयोग गर्नुपर्छ,’ उनले भने ।
प्रधानमन्त्री पुष्पकमल दाहाल प्रचण्डले नयाँ ढङ्गले काम गर्न चाहेको उल्लेख गर्दै यसको निम्ति राज्य संयन्त्र र संरचनाहरूको कार्यशैलीमा परिवर्तन आवश्यक रहेको उनको भनाइ थियो ।
सहकारीको रकम हिनामिना सुधार र समस्या समाधानका लागि काम गर्न उनले सरकारलाई आग्रह गरे ।