काठमाडौं । प्रधानमन्त्री केपी शर्मा ओलीले अमेरिकाको स्टेट पार्टनरसिप कार्यक्रम (एसपीपी) बारे अहिले कुनै प्रस्ताव नआएको बताएका छन् ।
अमेरिकी डेपुटी सेक्रेटरी रिचार्ड आर बर्माले हालै मात्र नेपाल भ्रमण गरेका थिए । प्रतिनिधि सभामा बिहीबार भएको प्रश्नोत्तर कार्यक्रममा माओवादी सांसद पूर्णबहादुर घर्तीले बर्मासँग एसपीपीबारे छलफल भए/नभएको प्रश्न सोधेका थिए ।
जवाफमा प्रधानमन्त्री ओलीले अमेरिकी डेपुटी सेक्रेटरी बर्माले आफूलाई भेट्दा दुई देशको बहुआयामिक सम्बन्धबारे चर्चा भएको जानकारी दिए ।
भेटका क्रममा अमेरिकी डेपुटी सेक्रेटरी बर्माले नेपाललाई दुईटा हेलिकप्टर दिने जानकारी दिए पनि अमेरिकी संसदबाट पारित हुन बाँकी रहेको बताए । तर एसपीपीका विषयमा कुनै कुराकानी नभएको उनले जानकारी दिए । ‘एसपीपी पहिले चर्चासम्म चलेको हो’, प्रधानमन्त्री ओलीले भने, ‘अहिले कसैले बढाउनुपर्छ भनेको छैन, कुनै प्रस्ताव आएको छैन ।’
राष्ट्रिय हितको प्रश्नमा सरकारले कुनै सौदाबाजी नगर्ने उनले बताए ।
