वीरगञ्जमा थप १ कोरोना संक्रमितको मृत्यु
वीरगञ्ज । वीरगञ्जमा एक कोरोना संक्रमित पुरुषको मृत्यु भएको छ । मृत्यु हुनेमा बारा जिल्लास्थित निजगढ नगरपालिका वडा नम्बर–३ बागदेवका २२ वर्षीय युवक रहेका छन् ।
श्वासप्रश्वासमा समस्या आएपछि गत माघ १५ गते पिसीआर परीक्षण गर्दा कोरोना संक्रमण पुष्टि भएको थियो । उनको अवस्था गम्भीर भएपछि माघ १६ गते थप उपचारको लागि नरायणी अस्पताल ल्याईएको थियो ।
उनको उपचारकै क्रममा मंगलबार दिउँसो ४ः३० बजे मृत्यु भएको नारायणी अस्पतालका कोभिड संयोजक डा उदय नारायणी सिंहले जानकारी दिए ।
कोभिड–१९ विरुद्धको खोप नलिएका युवकको मृत्युको कारण गम्भीर प्रकृतिको कोभिड निमोनिया रहेको डा सिंहले बताए ।
कोरोनाको तेस्रो लहरमा हालसम्म ८ जनाको मृत्य भएको छ । डा सिंहका अनुसार मृत्यु हुने ८ जना संक्रमित नै मधुमेह, दम, उच्च रक्तचाप जस्ता दिर्घरोगबाट ग्रसित भएकाले उनीहरुको कोरोना संगसंगै दिर्घरोगका कारणले पनि मृत्यु भएको हो ।
डा सिंहले सुरुवातदेखि नै खास गरि दिर्घरोगी, वृद्धवृद्धाहरुलाई सर्तकता अपनाउन आग्रह गरिरहेका छन् ।