सत्तारुढ दलको स्वार्थ परिपूर्ति गर्न प्रधानन्यायाधीशमाथि महाभियोग लगाइयो : अध्यक्ष थापा
काठमाडौं । राप्रपा नेपालका अध्यक्ष कमल थापाले सत्तारुढ दलको स्वार्थ परिपूर्ति गर्न प्रधानन्यायाधीशमाथि महाभियोग लगाइएको बताएका छन् ।
शनिबार पार्टी निकट राष्ट्रिय प्रजातान्त्रिक युवक संगठन नेपालको घोषणा सभामा अध्यक्ष थापाले एमसीसी पास गर्न र सभामुखमाथिको मुद्धा अघि नबढाउनैका लागि सत्तारुढ दलले प्रधानन्यायाधीशमाथि महाभियोग लगाइएको बताएका हुन् ।
थापाले न्यायपालिकालाई सुद्धिकरण गर्ने मनसाय दलहरुको नरहेको तर्क गरे । त्यस्तै उनले लामो समयदेखि सदन अबरुद्ध हुदा पनि दलहरु गम्भीर हुन नसकेको र लाज पचाएर तलव भत्ता भने बुझिरहेको धारणा राखे ।
उनले दलहरुकै कारण मुलुकको राष्ट्रियता कमजोर भइरहेको र नेपालमा विदेशीको चलखेल बढ्दै गएको उल्लेख गरे । त्यस्तै थापाले एमसीसी संसदबाट पारित गराउने बेलामा नेपालमाथि शक्ति राष्ट्रहरूले दबाब र प्रभाव दिएको पनि बताए ।
उनले राप्रपा नेपालको एजण्डेलाई स्थापित गर्न नयाँ शक्तिका साथ जनतामाझ जाने बताए ।
