नेपाल–भारत उद्योग वाणिज्य संघले भारतका लागी नवनियुक्त नेपाली राजदूत डा। शंकर शर्मालाई संघको सचिवालयमा स्वागत गरेको छ । कार्यक्रममा नेपाल–भारत उद्योग वाणिज्य संघका अध्यक्ष सृजना राणाले नवनियुक्त राजदूत शर्मालाई स्वागत गरेकी थिइन् । कार्यक्रममा नेपाल तथा भारत बीच रहेको बहुआयामिक सम्बन्धको चर्चा गर्नुका साथै वर्तमान द्विपक्षीय आर्थिक सम्बन्धमा रहेका विद्यमान समस्याहरूबारे अवगत गराइएको थियो ।

अध्यक्ष राणाले मित्रराष्ट्र नवनियुक्त राजदूत शर्मालाई नेपालमा औद्योगिक लगानी वृद्धि गर्न भारतका लागी नेपाली राजदूत एवं भारत स्थित नेपाली राजदूतावासको भूमिका महत्त्वपूर्ण रहेको बताउँदै नेपालले भारतसँगको व्यापार घाटा कम गर्न नेपालले आफ्नो उत्पादन क्षमतामा वृद्धि गर्नुका साथै निकासी अभिवृद्धिमा ध्यान पुर्‍याउनु अति आवश्यक रहेको स्मरण गराएकी थिइन् ।

उनले नेपालमा विद्यमान औद्योगिक विकासलाई अझ तीव्रता दिनको लागी तथा भारतीय लगानीकर्ताहरूलाई नेपालमा भारतीय लगानी भित्र्याउन राजदूतबाट विशेष पहल हुन अनुरोध गरिन् ।

कार्यक्रममा संघका महासचिव आरबि रौनियारले नेपाल–भारत व्यापार तथा पारवहनको क्षेत्रमा रहेका विद्यमान समस्याहरू बारे प्रस्तुति दिएका थिए । विशेष गरी नेपाल–भारत पारवहनको क्षेत्रमा इसीटीएसको सान्दर्भिकता, परिमार्जित नेपाल–भारत रेल सेवा सम्झौताले निर्दिष्ट गरे बमोजिमका रेल सेवाहरूको सञ्चालनमा नेपाली रेल सेवा कम्पनीहरूलाई पनि समावेश गरिनेलगायतका विषयहरूमा आवश्यक पहल गर्नमा पनि नवनियुक्त राजदूतको भूमिका एवं क्रियाशीलता महत्त्वपूर्ण रहने बारे अनुरोध गरे ।

कोषाध्यक्ष ज्ञानेन्द्र लाल प्रधानले पनि नेपालमा लगानीको लागी ठुलो सम्भावना भनेको जलविद्युत नै भएको र दुवै देशका लगानीकर्ताहरूको रुचि पनि पानीमै भएको कारणले ठुला लगानीकर्ताहरूलाई आकर्षित गर्न सकिन्छ भने यसको लागी भारतमा रहेका ठुला लगानकर्ताहरू ४–५ वटालाई बुझाउन सकिएको खण्डमा पनि नेपालको जलविद्युतको क्षेत्रको लागी ठुलो उपलब्धि हुन सक्ने हुँदा यसमा ध्यान दिनु अनुरोध गरेका थिए । उक्त कार्यक्रममा संघका उपाध्यक्ष सुनिल केसीले नेपालमा आउन चाहने साना तथा ठुला सबै किसिमका भारतीय लगानीकर्ताहरूका लागी दूतावासले सहजीकरण गर्न सकिने र सो को लागी नवनियुक्त राजदूत शर्माको भूमिका तथा विशेषज्ञता प्रभावकारी हुने विश्वास व्यक्त गरे ।