कलेजको विज्ञप्ति आफूलाई चोख्याउने नियतले आएको विद्यार्थीको दाबी

कलेज भन्छ, ‘फि मिनाहाको कुरा आरोपितले गरेका रहेछन्’

मित्रपार्कस्थित सेन्ट लरेन्स कलेजमा अध्ययनरत एक नाबालिगमाथि यौन दुर्व्यवहार गर्ने शिक्षकलाई पहिले नै कारबाही गरिएको कलेजको विज्ञप्ति झुटो र आफूलाई चोख्याउने नियतकासाथ आएको विद्यार्थीले दाबी गरेका छन् ।

सेन्ट लरेन्स कलेजका कोअर्डिनेटर जनार्दन अधिकारी र अर्का शिक्षक राजनकुमार पौडेलले आफूहरूलाई यौन दुर्व्यवहार गरेको भन्दै विद्यार्थीहरूले आन्दोलन गरिरहेका छन् । आरोपीलाई कारबाही गर्नुको साटो कलेजले उल्टै उनीहरूको पक्षपोषण गरेको, आरोपीलाई कानुनी कारबाहीको प्रक्रियामा नलगी त्यसै छाड्न लागिएको भन्दै विद्यार्थीहरूले मंगलबार दिनभर प्रहरी वृत्त गौशालामा आन्दोलन गरेका थिए ।

विद्यार्थीले आन्दोलन सुरु गरे लगत्तै प्रहरी वृत्त गौशालाले आरोपी कोअर्डिनेटर जनार्दन अधिकारी र अर्का शिक्षक राजनकुमार पौडेललाई पक्राउ गरेको थियो । उनीहरू दुवैलाई मंगलबार नै काठमाडौँ जिल्ला अदालतबाट ५ दिनको म्याद लिएर अनुसन्धान सुरु गरिएको छ ।

मंगलबार दिनभर सेन्ट लरेन्स कलेज र प्रहरी वृत्त गौशालामा तनाव भएपछि मंगलबार राती नै कलेजले एक विज्ञप्ति जारी गर्दै आरोपी शिक्षकलाई सोमबार नै बर्खास्त गरिएको स्पष्टीकरण दिएको छ । कलेजले जारी गरेको विज्ञप्तिमा घटनाबारे जेठ ६ गते शुक्रबार अनौपचारिक जानकारी आएको र जेठ ९ गते पीडित छात्राहरू र उनीहरूका अभिभावकसँग छलफल गरिएको बताइएको छ । सबैसँग छलफल गरिसकेपछि जेठ ९ गते साँझ बैठक बसी आरोपित शिक्षक जनार्दन अधिकारीलाई बर्खास्त गरिएको कलेजको विज्ञप्तिमा उल्लेख छ ।