अझै पनि छुवाछूतका घटना भइरहनु दुर्भाग्यपूर्ण : पूर्वप्रधानमन्त्री झलनाथ खनाल

रातोपाटी संवाददाता

पूर्वप्रधानमन्त्री तथा नेकपा (एकीकृत समाजवादी) का सम्मानित नेता झलनाथ खनालले दलित समुदायमाथि हुने सबै प्रकारका जातीय विभेद तथा छुवाछुत जन्य हिंसाको अन्त्य गर्न आवश्यक नीति, कार्ययोजना सहितको ठोस पहल गर्नका लागि सम्बन्धित निकायको ध्यानाकर्षण गराएका छन् । जातीय भेदभाव तथा छुवाछूत उन्मुलन राष्ट्रिय दिवसका सन्दर्भमा एक सन्देश जारी गर्दै नेता खनालले छुवाछूतमुक्त राष्ट्र घोषणालाई अपेक्षाकृत रुपमा कार्यान्वयन गर्न नसकिएको बताए ।

छुवाछुत मुक्त घोषणा गरिसकिएको अवस्थामा पनि छुवाछुत सम्बन्धि छिटपुट घटना भइरहनु दुर्भाग्यपूर्ण हो । दलित समुदाय माथि हुने सबै प्रकारका जातीय विभेद तथा छुवाछुत जन्य हिंसाको अन्त्य गर्न आवश्यक नीति, कार्ययोजना सहितको ठोस पहल गर्नका लागि सम्बन्धित निकाय सबैमा म गम्भीर ध्यानाकर्षण गराउँदछुु, जारी विज्ञप्तिमा उल्लेख गरिएको छ ।

नेता खनालले सम्पूर्ण पार्टी नेता कार्यकर्तालाई पनि विभेदका घटनाका विरुद्धमा सशक्त रुपमा उभिन र व्यावहारिक रुपमा नेपाललाई सवै किसिमका विभेदबाट मुक्त गरी सभ्य र समतामुलक समाज निर्माण गर्न आग्रह गरेका छन् ।