प्रतिनिधिसभाको आगामी बैठक सहज रूपमा सञ्चालन हुन्छ : माधव सापकोटा
काठमाडौँ- नेकपा (माओवादी केन्द्र)का सांसद माधव सापकोटाले प्रतिनिधिसभाको आगामी बैठक सहज रूपमा सञ्चालन हुने दाबी गरेका छन् ।
आइतबार संसद् बैठक स्थगित भएपछि सञ्चारकर्मीसँग कुरा गर्दै सापकोटाले सदनको अवरोध हटाउन दलहरूबीच निरन्तर छलफल भएकाले मध्यमार्गी विकल्प तय गरेर आगामी बैठक सहज रूपमा सञ्चालन हुने दाबी गरेका हुन् । उनले एमालेले सधैं अडान लिएर मात्रै नहुने भन्दै सोमबार बस्ने दलहरूको बैठकमा केही न केही सहमति हुने उल्लेख गरे ।
सापकोटाले सुन प्रकरणमा उच्चस्तरीय छानबिन समिति नबन्ने र सिआइबीले मुद्दाको अभियोजन नगर्दासम्म अरु समिति पनि नबन्ने जिकिर गरे ।
सांसद सापकोटाले लगातार सदन अवरुद्ध हुँदा त्यसले पारेको असर प्रति प्रतिपक्षी गम्भीर बन्नुपर्नेमा जोड दिए ।
