काठमाडौँ- युरो कप छनोटअन्तर्गत इंग्ल्यान्डले युक्रेनसँग बराबरी खेलेको छ ।

समूह ‘सी’ अन्तर्गत पोल्यान्डको स्टेडियन मिजस्की रोक्लमा शनिबार राति भएको खेलमा इंग्ल्यान्डले युक्रेनसँग १-१ गोलको बराबरी खेलेको हो ।

युक्रेनमा रुसको आक्रमण जारी रहँदा खेल पोल्यान्डमा खेलाइएको हो ।

ओलेक्जान्डर जिनचेन्कोले २६ औँ मिनेटमा युक्रेनलाई सुरुवाती अग्रता दिलाएपनि इंग्ल्यान्डका कायल वाकरले ४१ औँ मिनेटमा गोल गर्दै खेललाई बराबरीमा पुर्‍याए ।

छनोटअन्तर्गत अघिल्ला चार खेल जितेको इंग्ल्यान्डको यो पहिलो बराबरी हो ।

युरो कप छनोटको अन्य खेलमा स्विडेनले इस्टोनियालाई ५-०, बेल्जियमले अजरबैजानलाई १-० ले पराजित गर्दा इटालीले नर्थ म्यासेडोनियासँग १-१ को बराबरी खेलेको छ ।