काठमाडौँ- जलवायु परिवर्तनको असर अहिले विश्वभर नै देखिन थालेको छ । यसैबीच युरोपको जलवायु परिवर्तन एजेन्सी कोपर्निकसले डरलाग्दो भविष्यवाणी गरेको छ । एजेन्सीले २०२४ रेकर्डमा सबैभन्दा तातो वर्ष हुने भविश्यवाणी गरेको हो । विज्ञप्तिमा औसत तापमान पूर्व-औद्योगिक स्तर भन्दा १.५ डिग्री सेल्सियस माथि हुने उल्लेख छ ।

कोपर्निकसले यस वर्षको अक्टोबर सबैभन्दा तातो भएपछि यो भविष्यवाणी गरेको थियो । नोभेम्बर ११ मा अजरबैजानको बाकुमा हुन लागेको संयुक्त राष्ट्रसङ्घीय जलवायु सम्मेलनअघि कोपर्निकसको यो घोषणाले वैज्ञानिकहरूलाई चिन्तित बनाएको छ ।

संयुक्त राष्ट्रसंघको यस सम्मेलनमा विकसित देशहरूले जलवायु परिवर्तनको असरलाई न्यूनीकरण गर्न सन् २०२५ देखि विकासोन्मुख देशहरूलाई आर्थिक सहायता उपलब्ध गराउन सहमत हुन सक्नेछन् ।

कोपर्निकस क्लाइमेट चेन्ज सर्भिसका डेपुटी डाइरेक्टर सामन्था बर्गेसले भनिन्, ‘सन् २०२४ को १० महिनापछि, २०२४ रेकर्डमा सबैभन्दा तातो वर्ष हुनेछ भन्ने निश्चित छ ।’

यो विश्वव्यापी तापमान वृद्धिको लागि नयाँ रेकर्ड हुनेछ र कोप २९ शिखर सम्मेलन अघि जलवायु परिवर्तन सम्बन्धी महत्त्वपूर्ण मुद्दा हुनुपर्छ ।

युरोपेली एजेन्सीका वैज्ञानिकहरूले गत महिना अक्टोबर २०२४ विश्वकै दोस्रो सबैभन्दा तातो अक्टोबर भएको बताएका थिए। यसअघि सन् २०२३ को अक्टोबर पनि निकै तातो थियो, जब सतहको हावाको औसत तापक्रम १५.२५ डिग्री सेल्सियसमा रेकर्ड गरिएको थियो, जुन सन् १९९१ देखि २०२० सम्मको अक्टोबरको औसत तापक्रमभन्दा ०.८० डिग्री सेल्सियस बढी थियो।

यति मात्र होइन, सन् २०२४ को पहिलो १० महिना (जनवरीदेखि अक्टोबर) मा विश्वको औसत तापक्रम सन् १९९१-२०२० को सोही अवधिको तुलनामा ०.७१ डिग्री सेल्सियसले बढी थियो । त्यस्तै, सन् २०२३ को जनवरी–अक्टोबरको तुलनामा यस वर्षको सोही अवधिमा तापक्रम ०.१६ डिग्री सेल्सियस बढी थियो ।