न्युक्यासलमाथि टोटेनहमको सानदार जित
एजेन्सी । इंग्लिस प्रिमियर लिगमा टोटेनहम हटस्परले सानदार जित निकालेको छ । गएराति भएको खेलमा टोटेनहमले न्युक्यासलमाथि ५-१ को सानदार जित निकालेको हो ।
घरेलु टोलीलाई सानदार जिति दिलाउको लागि बेन डेभिस, म्याट दोहर्थी, ह्युङ मिन सन, इमर्सन रोयल र स्टेभन वर्गवाइनले गोल गरे । न्यूक्यासलका फावियनको गोल सान्त्वना बन्यो ।
खेलको ३९औं मिनेटमा फावियनको गोल गर्दै न्युक्यासललाई अग्रता दिलाएका थिए । ४३औं मिनेटमा बेन डेभिसले ह्युङ मिन सनको पासमा गोल गर्दै खेललाई बराबरीमा ल्याए । ४८औं मिनेटमा म्याट दोहर्थीले ह्यारी केनको पासमा गोल गर्दै टोटेनहमलाई २-१ को अग्रता दिलाए ।
५४औं मिनेटमा ह्युङ मिन सनले डिजान कुलुसेभ्स्कीको पासमा गोल गरेपछि टोटेनहमलाई ३-१ को अग्रता दिलाए । त्यसपछि इमर्सन रोयलले ६३औं मिनेटमा तथा ८३औं मिनेटमा स्टेभन वर्गवाइनले गोल गर्दै टोटेनहमको फराकिलो जित दिलाए ।
यो जितसँगै टोटेनहम ३० खेलबाट ५४ अंक जोडेर चौथो स्थानमा उक्लिएको छ । समान ५४ अंक नै रहेपनि दुई खेल कम खेलेको आर्सनल पाँचौमा रहेको छ । पराजित न्यूक्यासल ३१ ऋंक जोडेर १५औं स्थानमा रहेको छ ।