हालान्डको दुई गोलमा नर्वेको जित
एजेन्सी । युइएफए नेसन्स लिगमा नर्वेले जित निकालेको छ । गएराति भएको खेलमा नर्वेले स्वीडेनलाई २-१ गोल अन्तरले पराजित गरेको हो ।
नर्वेलाई जित दिलाउनको लागि दुवै गोल युवा स्टार एर्लिङ ब्राउट हालान्डले गरे । स्वीडेनको एन्थोनी इलांगाले एक गोल फर्काए ।
खेलको २०औं मिनेटमा हालान्डले पेनाल्टीमार्फत गोल गर्दै नर्वेलाई अग्रता दिलाएका थिए । ७९औं मिनेटमा हालान्डले नै गोल गर्दै नर्वेको अग्रता दोब्बर पारे ।
इन्ज्युरी समयमा इलांगाले एक गोल फर्काए । उनले डिजान कुलुसेभ्स्कीको पासमा गोल गरेका थिए ।
यो जितसँगै नर्वेले दुई खेलमा ६ अंक जोडर समुह बीको शीर्षस्थानमा रहेको छ । सर्विया र स्वीडेन समान ३-३ अंक जोडेर दोस्रो र तेस्रो स्थानमा रहेको छ । स्लोभेनियाले खाता खोल्न सकेको छैन ।