जसपासँग एकीकरण नगर्न नेतृत्वलाई लोसपा मधेस प्रदेशको सुझाव
जसपासँग एकीकरण नगर्न नेतृत्वलाई लोसपा मधेस प्रदेशको सुझाव
जनसेवा न्युज डटकम संवाददाता
लोकतान्त्रिक समाजवादी पार्टी नेपालको मधेस प्रदेश समितिले जसपासँग एकीकरण नगर्न नेतृत्वलाई सुझाव दिएको छ । सोमबार जनकपुरधाममा सम्पन्न भएको लोसपा नेपाल मधेस प्रदेश समितिको बैठकले निर्वाचनको मुखमा आएर पार्टी एकीकरण नगर्न पार्टी नेतृत्वलाई सुझाव दिएको हो ।
बैठकमा संगठन सुदृढीकरण, स्थानीय निर्वाचनको समीक्षा, पार्टीको सांगठनिक अवस्थालगायतका विषयहरुमा छलफल गरिएको लोसपा नेपाल मधेस प्रदेश समितिले जनाएको छ । बैठकमा स्थानीय निर्वाचनमा पार्टीका उम्मेदवारले पाएको मत र आगामी प्रदेश तथा प्रतिनिधि सभाको निर्वाचनमा अन्य पार्टीसँग चुनावी तालमेल गर्नेलगायतका विषयमाथि समेत छलफल गरिएको जनाइएको छ ।
बैठकमा लोसपा नेपालका मधेस प्रदेश समितिका अध्यक्ष जितेन्द्र सोनलले जनता समाजवादी पार्टी नेपालका अध्यक्ष उपेन्द्र यादवले काँग्रेस र कम्युनिस्टसँग मिलेर मधेसलाई कमजोर बनाएको आरोप लगाए ।
मधेस प्रदेशसभामा लोसपा संसदीय दलका नेता समेत रहेका सोनलले मधेस आन्दोलनको मुद्दामाथि कुठाराघात गरेर पटक पटक धोका दिएकाहरुको असली चरित्र जनतालाई देखाउन र मधेसवादका लागि सक्रिय रहन आग्रहसमेत गरेका छन् ।
उनले बैठकमा भएका छलफल समेटेर केन्द्रीय कमिटीलाई प्रतिवेदन पठाउने निर्णय भएको बताए ।