प्लेयर टू वाच स् ह्युगो लोरिस, फ्रान्स

जनसेवा न्युज डटकम संवाददाता

ह्युगो लोरिस विश्वकपको अन्तिम १६ मा हुने पोल्याण्डविरुद्धको खेलमा फ्रान्सका लागि सबैभन्दा धेरै खेल खेल्ने लिलियन थुरामको कीर्तिमान बराबरी गर्दैछन् । सो खेल फ्रान्सका लागि उनको करियरको १४२ औँ खेल हुनेछ । सन् १९९८ को विश्वविजेता टोलीको सदस्य रहेका थुरामले सो कीर्तिमान आफ्नो १४ वर्ष करियरमा बनाएका थिए ।

‘यो सानो उपलब्धि होइन । म निकै गौरवान्वित महसुस गरिरहेको छु,’ फ्रान्सका कप्तानले भनेका छन् । टोटनहम हटस्पर्सका गोलकिपर यो महिनाको अन्त्यमा ३६ वर्ष पुग्दैछन् । थुरामले अन्तर्राष्ट्रिय करियरबाट सन्यास लिएको केही महिनापछि उनले सन् २००८ को नोभेम्बरमा फ्रान्सका लागि डेब्यू गरेका थिए ।

सन् २०१८ मा उनकै नेतृत्वमा फ्रान्सले विश्वकपको उपाधि जितेको थियो । गत बुधबार ट्युनिसियाविरुद्ध १–० को पराजय बेहोर्दा उनलाई आराम दिइएको थियो । आजको खेलमा उनी सुरुवाती ११ मा पर्ने पक्का छ ।

प्रशिक्षक डिडिएर डेसच्याम्प पनि लोरिसको तारिफ गर्छन् । उनी आफैले फ्रान्सका लागि १०३ खेल खेलेका छन् भने लोरिस अघि उनकै नेतृत्वमा फ्रान्सले विश्वकपको उपाधि उचालेको थियो । ‘कीर्तिमानहरु भंग गर्नका लागि हुन् । केही कीर्तिमानहरुको महत्त्व अरु भन्दा पक्कै हुन्छ । यति लामो समय उच्च श्रेणीमा खेल्दै यति धेरै खेल खेल्नुले आफै सबै कुरा बयान गर्छ,’ उनले भने ।

पोल्याण्डविरुद्ध आजको खेलमा फ्रान्सले नै जित्ने अपेक्षा गरिएको छ । तर, पोल्याण्डका रोबर्ट लेवान्डोस्की फ्रान्सका लागि चुनौती बन्न सक्छन् । लेवान्डोस्कीलाई रोक्न फ्रान्सको डिफेन्सको अन्तिम लाइनमा रहेका लोरिसले महत्त्वपूर्ण भूमिका खेल्ने अपेक्षा गरिएको छ ।