चितवन- भरतपुरका केही स्थानमा विद्युत् सेवा अवरुद्ध हुने भएको छ ।

भरतपुर-माडी-ठोरी हुलाकी सडक अन्तरगत भरतपुरको विकाशचोकदेखि सिताराम चोकसम्म विद्युत् पोल सार्न लागिएको हुँदा त्यस क्षेत्रमा भोलि दिनभर विद्युत् सेवा अवरुद्ध हुन लागेको हो । विद्युत् दिउँसो १० देखि ५ बजेसम्म अवरुद्ध हुने भरतपुर वितरण केन्द्रका इन्जिनियर राजेन्द्र पौडेलले जानकारी दिए ।

११ केभी भृकुटी फिडरको क्यान्सर अस्पतालदेखि दक्षिणतर्फ विद्युत् सेवा अनियमितता हुने पौडेलले बताए । हाकिम चोकदेखि गितानगर क्षेत्रमा सडक विस्तारको काम भइरहेको छ । सडकको मापदण्डमा पर्ने पोल सार्न लागिएको हो । यसबाट ग्राहकमा पर्न जाने असुविधाप्रति नेपाल विद्युत् प्राधिकरण क्षमाप्रार्थी रहेको उनले बताए ।