२५ भदौ, काठमाडौं । नोभाक जोकोभिचले वर्षको अन्तिम ग्राण्ड्सलाम टेनिस यूएस ओपनको उपाधि जित्दै २४औं उपाधिको कीर्तिमान बराबरी गरेका छन् ।
३६ वर्षीय जोकोभिचले सोमबार बिहान सम्पन्न पुरुष एकल फाइनलमा रुसियन ड्यानिएल मेदभेदेवलाई ६-३, ७-६ (७-५), ६-३ ले पराजित गर्दै यूएस ओपनको उपाधि जिते ।
यो उनको करियरको २४औं ग्राण्ड्सलाम उपाधि हो । यो उपाधिपछि जोकोभिचले मारगरेट कोर्टको नाममा रहेको २४ ग्राण्ड्सलाम उपाधि जित्ने कीर्तिमान बराबरी गरेका छन् ।
‘यो निश्चय पनि मेरो लागि सारा विश्व हो,’ २४औं उपाधि जितेपछि जोकोभिचले भने ।
जोकोभिचले आफूले कहिल्यै पनि यहाँसम्म पुग्ने भनेर नसोचेको तर पछिल्लो केही वर्षमा भने इतिहासमा नजर रहेको र किन यो अवसर सदुपयोग नगर्ने भनेर सोचेको बताए ।
वर्षको सुरुमा अष्ट्रेलियन ओपन जित्दै राफेल नाडललको २२ ग्राण्ड्सलामको कीर्तिमान बराबरी गरेका जोकोभिचले फ्रेन्च ओपन जितेर नाडलको कीर्तिमान तोडेका थिए । विम्बलडन ओपनमा उनलाई मारगरेटको कीर्तिमान बराबरी गर्ने अवसर रहेपनि फाइनलमा पराजित भए । तर, यूएस ओपन जित्दै उनले मारगरेटको कीर्तिमान बराबरी गरेका हुन् ।
यस वर्ष जोकोभिचले चारमध्ये तीन ग्राण्ड्सलाम उपाधि जिते ।
उनले १० पटक अष्ट्रेलियन ओपन, ७ पटक विम्बलडन ओपन, ४ पटक यूएस ओपन र तीन पटक फ्रेन्च ओपनको उपाधि जितेका छन् ।
