काठमाडौँ- टी-ट्वान्टी विश्वकप छनोटको एसिया क्षेत्रका छनोटका खेलहरू नेपालमा आगामी कात्तिक १३ गतेबाट सुरु हुने भएको छ । प्रतियोगिता कार्तिक २३ गतेसम्म चल्नेछ ।

अन्तर्राष्ट्रिय क्रिकेट परिषद् (आइसीसी)ले नेपाललाई एसिया क्षेत्रको छनोट चरणका खेलहरू आयोजना गर्ने अधिकार पहिले नै दिइएको थियो । टी-ट्वान्टी विश्वकप सन् २०२४ को जुनमा अमेरिका र वेस्ट इन्डिजले संयुक्त रूपमा आयोजना गर्ने छन् ।

नेपालमा हुने छनोटका खेलहरूबाट दुई टोलीले टी-ट्वान्टी विश्वकप खेल्ने आइसीसीले बुधबार सार्वजनिक गरेको विज्ञप्तिमा उल्लेख छ ।

प्रतियोगितामा नेपालसहित ८ राष्ट्रको सहभागिता रहनेछ । अन्तिम छनोटमा नेपालसँगै युएई, ओमान, हङकङ, सिंगापुर र बहराइन  पुगिसकेका छन् । बाँकी दुई राष्ट्र प्रारम्भिक छनोट पार गरेर सहभागिता गर्ने छन् ।